IMPLEMENTASAUN DIREITU UMANU IHA KONTEXTU TIMOR-LESTE

 IMPLEMENTASAUN DIREITU UMANU  IHA KONTEXTU TIMOR-LESTE

Hakerek na'in    :Jose-Soares

Fakuldade          :Filosofia Ciencia Humana

Semester             : 4 Eskola iha  

                                UNTL

1. Antesendente

    Direitu  umanu  mak dalan ne’ebé importante ba sosiedade. Tanba bainhira bebe ne’ebé sei iha inan nian knotak, nia hetan ona  direitus umanu. Tanba nia mós direitu atu moris iha mundu.Nia direitu  hakarak moris ho prosperidade. Nia lakohi emak seluk atu hamate ninian direitu  umanu  bainhira nia matan nakloken. Tanba nia hakarak ema seluk mós fó respeitu ba ninian direitu  umanu. Tanba ninian direitu umanu mak hanesan misteriu ka grasa hosi Maromak. Maromak maka fó direitu  umanu boot ba nia. Tanba Maromak maka kria nia nu’udar Maromak ninian illas iha mundu. Nia kria labarik hosi inan nian  knotak, nu’udar umanu la hases hosi terus bainhira bebe iha inan nian knotak. Iha evanjeillu Saun joão 16:21 hateten: “bainhira  feto ida atu tur iha ahi, nia neon sala basa nia oras to’o  ona; ma’ibé tur ahi hotu tiha, nia haluhan ona nia terus hodi ksolok tanba ema ida  moris ona ba mundo”. Ne’e hatudu katak feto fó respeitu ka responsabilidade ba Maromak nian kriadór maske nia hetan problema barak iha ninia moris tomak ma’ibé nia ksolok nafatin atu simu bebe nian direitu  umanu  iha mundu. Atu nune’e  nia bele servi ninian direitu  nu’udar umanu iha komunidade nian laran. 

    Direitu  umanu  mak dalan ida ne’ebé importante ba demokrasia. Direitu  umanu mak pillar importante ba nasaun demokrasia, direitus umanus mak hahalok ne’ebé iha  ka hala’o tuir morál, toman di’ak ba lei haruka. Direitu  mak buat ne’ebé absolutu sai ita nian rasik no ita uza konforme ita nian hakarak rasik. Ezemplu: direitu atu hetan instrusaun, direitu  atu fó sai opiniaun. Ma’ibé direitu mós la hadook hosi devér, obrigasaun ka devér tenki  hala’o ho sentimentu ne’ebé responsabilidade. Direitu  umanu  no devér tuir mós konstituisaun RDTL iha Artigu ruanulu resin-ualu (28). Bainhira ita koalia konaba  direitu  umanu, entaun la hases hosi  direitus sivíl no politiku. Tanba direitu  sivíl no politíku mak sai hanesan direitu  umanu konaba moris, ukun rasik-an, liberdade ekspresaun, Assembleia (halibur) no direitu atu livre hosi dadur arbitrariu, detensaun no tortura. Nu’udar nasaun indepedensia, povu  Timor leste hetan ona auto-determinasaun no hetan ona nivél aas konaba liberdade, ko’alia mós halibur (Assembleia) no tuir jeneralidade atu hetan liberdade. 

 

2. Ojektivu

    Direitu  umanu  nian objektivu atu fó sai katak:” direitu umanu  mak hanesan buat ne’ebé  absolutu iha ema idak-idak nian rasik. Objektivu atu deklara ba sosiedade katak: oinsa ita idak –idak toman atu responsabilidade ita nian direitu umanu  iha publiku ka iha komunidade nian le’et. Tanba dalabarak ita uza ita nia direitu  umanu  latuir ita nian absolutu, ma’ibé ita tuir fali ita nian arrogante. Direitu  umanu  nia  objektu katak hatudu ba sidadaun tomak atu respeitu direitu umanu  nu’udar grasa hosi Maromak. Tanba direitu  umanu mak xave importante ba ema ida-idak nian dignidade. Tuir matenek nain ida ho naran John Locke hateten katak : “ Direitu  umanu mak direitu  ne’ebé belit iha ema individu nian dignidade bainhira nia sei iha inan nian knotak, hafoin moris iha mundu”. Ida ne’e hatudu katak direitu umanu lahadook hosi ema individu nian dignidade.

3.    Difinisaun Konseitu  Hosi Direitu Umanu

    Difinisaun  direitu  umanu  ne’ebé belit iha ema ida-idak , ne’ebé maka ema individu   implementasaun  iha sosiedade ka iha nasaun ida nian  laran. Bainhira ita buka tuir direitu  umanu  nian  difinisaun konseitu hosi livru ida ba livru seluk no pensamentu hosi  matenek ida ba matenek seluk, deskobre katak : direitu  umanu  nian  difinisaun konseitu hamutuk iha  etapa neen (6). Mak hanesan tuir mai ne’e : etapa dahuluk ; Direitu umanu   individu, etapa daruak; Direitu  umanu  politiku, etapa datoluk;  Direitu umanu, etapa dahaat ; Direitu  umanu  ekonomia,  etapa daliman; Direitu  umanu  justisa no tribunál,  etapa daneen; Direitu  umanu ba kultura sosial. Hirak ne’e mak tuir Matenek na’in  nian hanoin no mós tuir (Kamus Besar Bahasa Indonesia) ne’ebé hakerek  konaba  difinisaun direitu  umanu.

3.1. Direitu  umanu individu (Personal Rights).

    Ida ne’e mak hanesan direitu  umanu  ba ema individu, tanba direitu  umanu  individu mak sai xave fundamentál ba ema idak-idak. Mak hanesan tuir mai ne’e:

• Liberdade atu ba, book an, muda ba fatin oin-oin.
• Liberdade atu hato’o opiniaun
• Liberdade atu halibur malu no halo organizasaun.
• Liberdade atu hili, hakoak, no tuir relijiaun ne’ebé mak ema ida-idak fiar.

3.2. Direitu  umanu  Politiku (Political Rights).

    Direitu  umanu  Politiku ne’e signifika katak ema hotu-hotu tenki hetan liberdade, demokrasia, no halo tuir ema individu nian interese rasik. Liu-liu halo tuir Governu ka Estadu. Mak  hanesan tuir mai ne’e:

1. Direitu atu hili no simu iha votasaun nian.
2. Direitu  atu tuir aktividade Estadu nian.
3. Direitu atu hari'i partidu politika no organizasaun politika.
4. Direitu atu halo kartu proposta  petisaun.

3.3. Direitu  umanu  (Legal Equality Rights).

Direitu  umanu  mak sai hanesan bé-matan ba ema individu nian dignidade, ka ema individu nian mehi bainhira nia moris iha sosiedade ka iha nasaun demokrasia nian laran. Mak tuir mai ne’e:

• Direitu  atu hetan tratamentu ne’ebé iha hanesan Lei no Estadu.
• Direitu  ema individu atu sai funsionariu no funsionaria sivíl.
• Direitu  atu hetan protesaun (akompaña) no serve ba Lei.

3.4. Direitu  umanu Ekonomia (Property Rights)

    Povu moris iha nasaun ida, tenki iha direitu  umanu  ekonomia. Tanba ekonomia sai pontu importante ba povu nian moris. Povu tenki iha liberdade atu buka moris no liu-liu ba direitus umanus ekonomia. Mak mensiona tuir mai ne’e:

1. Liberdade atu halo aktividade fa’an no sosa.
2. Liberdade atu halo akordu ka kontratu.
3. Liberdade atu halo aluga no fó aluga, deve. 
4. Liberdade atu hili buat ruma.
5. Liberdade atu hili servisu ne’ebé mak bele.

3.5. Direitu  umanu  Justisa  Tribunál (Procedural Rights)

    Direitu  umanu  justisa mak sai hanesan ponte ida ba liberdade, demokrasia.Tanba bainhira nasaun ida hakarak atu hetan felizsidade no armonia. Mak tenki liu hosi direitu  umanu  justisa. Mak hanesan tuir mai ne’e:

• Direitu  atu hetan defende autodefeza/defeza (ex: defeza patria nian) Lei iha justisa.
• Direitu  atu hetan igualdade iha tratamentu, revista, detensaun (kaer-nain), dadur (komarka),  no peskiza  iha Lei nian oin.

 3.6. Direitu  Umanu ba Kultura Sosial ( Social Culture Rights).

    Sidadaun ida ne’ebé moris iha nasaun ida, no  moris iha estadu nian okos. Nia tenki iha direitu  umanu  ba kultura sosial. Tanba nia iha direitu  atu renova ninian kultura sosial. Mak hanesan tuir mai ne’e :

1. Direitu  atu determina, hili no hetan edukasaun.
2. Direitu  atu hetan instrusaun,( hanorin).
3. Direitu  atu dezenvolve kultura ne’ebé tuir ho ninia  hakarak.

4. Enkuadramentu Teoriku

  Tuir matenek nain neen (6) ne’ebé mak deskobre konaba Direitu  umanu:

  Dahuluk Tuir matenek na’in ho naran Meriana Budiarjo hateten katak  Direitu Umanu  mak direitu  ne’ebé ema individu hetan ona bainhira hahoris  iha mundu, Direitu  ida ne’e hahalok universál tanba laiha deferensa mane no feto, rasa, kultura, suku, relijiaun. nst. Tanba  ne’e ita nu’udar kriasaun umanu, ita labele fó respeitu de’it ba ema ida ne’ebé ita gosta, ho lian seluk (pilihan kasih) ma’ibé ita tenki fó respeitu ba ema hotu-hotu. Tanba direitu  umanu  ne’e  hahalok universál.

    Daruak Tuir profesór. Koentjoro Poerbopranoto esplika katak Direitu  umanu mak  Direitu  ne’ebé hahalok nian fundamentál ka bazeia, Direitu  ne’ebé ema individu hetan ona fundamentál, nia destinu sei labele fahe ninian fundamentál tanba nia hahalok hanesan sagradu. Ho razaun ida ne’e katak  ema ida labele kaer  ema seluk nian direitu. Ho liafuan seluk hateten katak  ema ida laiha podér atu hamate ema seluk nian direitus. Ida ne’e hatudu mai ita katak ita tenki konsidera ba ita nian maluk sira. Ita labele halo violasaun hasoru sira tanba sira nian direitu mós hanesan ita nian direitus. Ita tenki halo kolaborasaun entre ita ho sira. Atu nune’e  ita ida-idak nian direitu nafatin sagradu.

    Datoluk Tuir  pensamentu hosi Oemar Seno Adji katak Direitu  umanu  maka  direitu  ne’ebé belit iha ema ida-ida nian dignidade, hanesan nia kriasaun hosi Maromak, nia hahalok labele viola ka harau hosi ema seluk ka grupu seluk. Pensamentu ida ne’e atu fó motivasaun ba ita, Hodi  nune’e ita labele harau ema ida nian direitu.  Ma’ibé  realidade iha ita nia moris ita sempre harau ema seluk nian direitu. Liu-Liu iha  ita nian Rain Doben Timor-Leste akontese barak konaba  viola ema seluk nian direitu. Ezemplu badak ida mak hanesan iha tinan kotuk liu ba, ema so’e bebe iha Lahane ma’ibe grasa Maromak  hosi avo mane bele salva bebe ida ne’e,  no ida seluk ema so’e bebe iha tasi tolu ma’ibé nia la salva tanba bebe nian inan harau ka hamate tiha bebe nian direitus no mós iha fatin seluk-seluk. Konaba esperiensia sira ne’e , ha’u hakarak dehan katak iha Timor oan barak mak harau sira nia maluk nian direitus. Tanba Timor oan barak mak seidauk konsidera ka seidauk fó respeitu ba ninian maluk nian direitu  umanu. Esperiensia seluk mak liu-liu joven feto no mane sira ne’ebé mak halo viola nafatin ba bebe nian direitu. Ma’ibé ha’u espera katak bainhira ita le’e ka rona pensamentu hosi matenek na’in ida ho naran Oemar. Ita sei hatene no komprende konaba direitu umanu. No hosi kompresaun ida ne’e, ita sei fó respeitu ba ema ida nian direitus tanba direitus umanus ne’ebé belit iha ema ida-idak nian dignidade no ita sei lahatun ema ida nian dignidade iha ema barak nian leet.

    Dahaat Tuir  Wikipedia nia  hanoin  konaba  Direitu  umanu  maka direitu ne’ebé ema ida-idak hetan ona bainhira nia sei iha inan nian knotak. Durante ne’e  ita nunka  hanoin katak bainhira ita sei iha inan nian knotak ita hetan tiha ona direitu  umanu. Dalaruma ita tur mesask ita husu pergunta ba ita nian-an katak ita nian direitu  umanu  mai hosi ne’ebé? Dalabarak pergunta ne’e halo ita kompuzaun ka duvida  atu komprede ka hatene direitu  umanu nian hun. Maske loron-loron ita temi katak ha’u nian direitus atu halo ida ne’e no halo ida ne’ebá. Ma’ibe ita seidauk komprende didi’ak saida mak direitu  umanu? No oinsá mak direitu  umanu moris? Maske loron-loron  ita utiliza liafuan direitus ma’ibé ita seidauk hatene lolos direitu  nian moris fatin no direitu  nian loron moris. Liafaun direitu  ne’e sempre halo ita duvida tanba ita seidauk hatene kle’an konaba direitu   nian loron moris. Ma’ibé bainhira ita le’e teoria hosi matenek ida ho naran Wikipedia. Ita sei komprede no hatene konaba direitu  nian loron moris ka nia fatin moris. Tanba Wikipedia  esplika katak direitu  umanu  mak direitu  ne’ebé ema individu hetan ona bainhira nia moris iha inan nian knotak. Ne’e hatudu katak direitu  umanu nian loron moris ka fatin moris, bainhira ita sei moris iha inan nian knotak.

    Daliman Tuir Thomas Hobbes nia opiniaun katak Direitu umanu  iha  importante ba ema ida-idak mak Direitu moris. Ne’e signifika katak ita ida-idak livre atu fó sai opiniaun no livre buka matenek ka livre buka moris  nst. Tanba ita direitu atu moris no direitu  atu fó kontribuisaun ba maluk sira. Liu-liu fó kontribuisaun ba ita nian nasaun Timor-leste. Hodi nune’e  ita nian paíz ida ne’e   bele hetan harmonia no paz bainhira ita nafatin fó kontribuisaun. Kontribuisaun liu hosi hatudu atetude ne’ebé di’ak no hari’i  amizade ne’ebé di’ak iha ita nian nasaun Timor-Leste. Hodi nune’e ita ida-idak nian direitu  nafatin moris hanesan ai-funan ida ne’ebé buras iha jardin. Nune’e  mos ita nian direitu  nafatin moris iha Rain-Doben Timor-leste.

    Daneen Pensamentu hosi prof.Wahyono katak  Direitu  umanu  maka direitu ne’ebé ema moris fundamentál  fó folin ba dignidade. Ne’e hatudu katak ita labele hatun ema seluk nian dignidade iha ema barak nian oin. Se kuandu hatun ona ema ida nian dignidade iha ema barak nian oin, entaun signifika katak ita la fó folin ba ninia dignidade ka direitu. Nune’e  mós ita labele sai taraidór ba ita nian dignidade rasik, signifika katak ita labele halo moe ita nian-an iha barak nian oin. Ezemplu: na’ok ema nian sasan, ka estrega ema ruma iha sosiedade nian le’et. nst. Asaun sira ne’e hatudu katak ita la fó folin ba ita nia dignidade ka direitus. Dalan ne’ebé di’ak atu ita fó folin  ba ita nian dignidade mak ita tenki hatudu hahalok ne’ebé di’ak iha ita nian moris. Tanba Prof. Wahyono fó motiva mai ita katak ita ida-idak tenki kuidadu ita nian direitus umanus atu bele fó folin ba ita nian dignidade.

    Tuir KBBI (Kamus Besar Bahasa Indonesia) : “ Direitu  umanu  maka Direitu ne’ebé preteje hosi Internasionál, mak hanesan ( Deklarasaun PBB Declaration of Human Rights), hanesan maka direitu atu moris, direitu atu indepedensia, direitu atu propriedade, direitu atu fo sai opiniaun. Razaun sira ne’e mak nasaun ida-idak tenki indepedensia no nasaun ida labele ukun nasaun seluk. Tanba KBBI hakerek katak nasaun ida direitu atu indepedensia. Povu ida labele halo torturasaun ba povu seluk.

5. Saida mak Direitu umanu?

    Sr. Violanto Ribeiro  hato’o ninia opiniaun konaba  “Direitu umanu”  iha loron tersa-feira dia 15-10-2019  iha  GMT nia oin. Nia nu’udar estudante fakuldade direitu iha UNTL no agora dadaun nia terseiro ano. Tuir Sr. Violanto Ribeiro nia opiniaun konaba direitu  umanu  katak, “ Iha 10/12/1948  Organisaun Nasaun Unidas aprova deklarasaun universais os direitu umanu. Direitu  umanu  mak direitu  hotu-hotu ne’ebé  mak relasiona atu garantia dignidade ema nian. Direitu  umanu  mak direitu ne’ebé  fó respeita ba dignidade umana. Direitu  umanu  hanesan mós baziku ba ema nian moris, hanesan mós liberdade baziku ba dignidade ema nian. Direitu  umanu bele hateten katak direitus ne’ebé fó respeitu ba moris ema nian. Hanesan ita nian kontituisaun RDTL ne’ebé konsagra mós direitu  fundamentais ne’ebé adopta hosi deklarasaun universais direitu  umanu. Timor-Leste hanesan membru ba nasaun unidas ne’ebé mak adpota prinsipius jeral ne’ebé mak hatu’ur  iha artigu 16 konstituisaun RDTL ne’ebé mak ko’alia konaba universalidade no igualidade, iha ne’eba hateten katak hotu-hotu moris livre no iha direitu hanesan de’it, laiha kualker tipu deskriminasaun ba ema ida. Ezemplu hanesan diskriminasaun ba kor, diskriminasaun ba rasa, ba relijiaun, ba kultura, etika sosiál no politika. Ne’e  atu hateten katak iha konstituisaun RDTL mós adopta direitus fundamentais barak mak hanesan direitu ba moris ou direitu a vida ne’ebé mak konsagra iha artigu 29, labele viola  ema ida nian vida, hanesan labele oho ema no mós direitu  fundamentais seluk ne’ebé mak ko’alia konaba direitu umanu hanesan liberdade iha ekspresaun ne’ebé mak hatu’ur  iha konstituisaun RDTL iha artigu 40. Artigu ne’ebé mak refere atu hateten katak Timor-Leste mós hanesan Estadu demokrasia ida. Adopta prinsipiu jerál ba direitu  umanu  nian”. Ida ne’e mak Violanto nia opiniaunka ka ideia  konaba saida mak direitu  umanu  mak direitu ne’ebé fó respeitu ba dignidade ema nian.

    Profesór Tomé  Xavier Jerónimo, Nia nu’udar  Prosefór Fakuldade Direitu iha UNTL . Iha loron kurta-feira dia 16-10-2019 iha bibilioteka fakuldade direitu nian. Nia esplika katak, “Tuir ha’u hanoin konaba direitu  umanu  mak ema hotu-hotu moris livre, no tuir Maromak nian lia-fuan katak ema moris mai iha mundu, Maromak fó kedas direitu ba nia. Ema ida labele foti arbiru, Ezemplu direitu moris ou direitu da vida, ida ne’e relasaun ba ita. Direitu  fundamentais seluk,  ha’u  direitu hemu, direitu han,direitu ba eskola no direitu atu hetan edukasaun di’ak hanesan ema seluk. Direitu moris iha ambiente, entaun ita ko’alia  mós direitu devér. Ezemplu; ita moris iha familia ida, oan nian devér atu halo tuir buat ne’ebé Aman no Inan nian hakarak.  Ma’ibé Oan nian direitu mós Inan no Aman halo tuir. Ezemplu hanesan oan atu ba eskola, han, hatais nst, buat sira ne’e, Aman no Inan nian devér. Ma’ibé oan nian direitu tenki estuda di’ak no hetan notas ne’ebé di’ak. Ida ne’e ko’alia konaba ambiente familia no sosiedade nian.

  Ba nasaun,  ita ko’alia konaba Estadu, ema hanesan sidadaun no Estadu. Kuandu ita iha juridika katak konstituisaun ne’e ita ligasaun ho Estadu ida, mak ita iha direitu no devér. Ita iha devér kuandu Estadu haruka ita atu halo buat ruma, ita hanesan sidadaun ne’ebé  di’ak ita tenki kompri buat ne’ebé Estadu haruka. Ma’ibé mós iha direitu atu moris, direitu atu hetan servisu, edukasaun no moris hanesan sidadaun seluk. Respeita ema seluk nian direitu, direitu ida ke ita moris iha estadu. Ita iha devér ba estadu ma’ibé ita mós direitu ba estadu tanba  Estadu hanesan Aman ida ka Inan ida atu tau matan ba sidadaun hotu-hotu”.

    Durante ha’u diskusaun ho Frater Marcelino Soares SVD  iha Seminario Manleoana iha loron kuarta-feira, dia 17/10/2019 konaba direitu  umanu.  Nia fó esplikasaun Direitu  signifika katak “ninian ka kbi’it ne’ebé mak nia iha” ka lian melayu hateten katak : “(Hak bearti adalah kepunyaan atau kekuasan atas sesuatu).  Umanus signifika katak: “baziku ka fundamentál nian”. Ho lian melayu dehan katak:   ( Asasi bearti hal yang mendasar). Tanba ida ne’e mak direitu  umanu  sai xave fundamentál ne’ebé importante tebes ba ema individu, nune’e mos mane ka feto. Razaun katak direitus umanus hanesan grasa ka misteriu hosi Maromak. Tanba ne’e ema seluk labele destrui ema ida nia  direitu  umanu. Nia direitu umanu  atu moris, liberdade,demokrasia, no direitu atu buka moris, direitu atu matenek nst”.

6. Oinsá Implementasaun Direitu Umanu iha Timor-Leste?

    Hanoin hosi Sr. Violanto Ribeiro konaba implementasaun direitu  umanu  iha Timor-Leste. Nia relata katak , “ Tuir ha’u nian observasaun implementasaun direitu  umanu  iha Timor-Leste hanesan nasaun ida ke foun. No foin mak Restaurasaun Indepedensia iha 2002 konaba implementasaun direitu  umanu iha Timor-Leste kompara ho tempu ida agora no  tinan uluk liu ba iha mudansa tebes, Iha ema barak mak komesa koiñesimentu konaba  direitu  umanu  no iha ona formasaun konaba direitu  umanu. Entaun atu hateten katak ha’u nian observasaun  iha mudansa boot tebes ne’ebé mak agora akontese iha Timor. Ezemplu agora se mak viola ema seluk nian nia vida ka oho ema seluk, nia tenki responsabilidade iha entindades ka governo ne’ebé mak toma konta ida ne’e.  Maske dalabarak ita hare’e iha Timor-Leste sei iha violasaun ruma direitu  umanu ma’ibé ha’u hanoin ida ne’e ba futuru ita sei hadia. Mezmu ke ita nasaun foun ma’ibé implementasaun  direitu umanu  nian avansadu tebes. Maske iha failla balun, violasaun balun ne’ebé mak ita nian instituisaun publiku ne’ebé barak mak viola ona direitu umanu. Ezemplu hanesan iha Timor-Leste iha Lei fó dalan katak sidadaun hotu iha liberdade atu hato’o nian opiniaun ma’ibé dalabarak iha oknu instituisaun balun viola halo agresaun fisika hasoru sidadaun Timorense balun. Ida ne’e hateten katak implementasaun direitu umanu  ne’e bele dehan katak faruk tebes tanba kria tiha Lei ma’ibé latuir Lei no la respeita Lei”.

    Tuir pesamentu hosi Profesór Tomé Xaviér Jerónimo  konaba implementasaun direitu  umanu iha Timor-leste. Nia esplika katak, “ ita liga ba estadu ka sidadaun ne’ebé mak akontese iha ita nian Rain, hanesan ema hotu-hotu iha direitu atu moris liberdade iha komunidade nian laran. Estadu ne’e, ha’u hare’e katak hanesan kompara,  ita hateke  ba Rai ida (satu pulau) ka illa ida ne’ebé ita hotu  hakarak mehi to’o ba illa ne’e. Ita nian matan hateke illa ne’e ma’ibé ita hotu foin la’o hela. Mehi ida ne’e mak tuir ita nian Republika Demokratika de Timor-Leste hakerek ona konstituisaun RDTL liu-liu iha  direitus umanus ne’ebé  komesa  hosi Artigu 1, 16  no to’o Artigu 50 konaba direitu servisu no direitus fundamentais, no direitu moris. Ma’ibé ita hakat hela dadaun, lasignifika katak direitu  umanu  iha Timor la la’o ma’ibé la’o hela. Ezemplu Estadu atendementu ba labarik, juventude, difisiente (alizadu), Terseira Idade, katak implementasaun direitus umanus iha Timor-Leste la’o. Ma’ibé dalabarak sidi-sidi hela tanba la’os ema hotu hala’o  sem-porsentu (100%)”.

    Tuir  Ideia hosi Frater Marcelino SVD  konaba Implementasaun direitu umanu  iha Timor-Leste mak hanesan, “ konstituisaun RDTL komesa hakerek Artigu barak no liu-liu Artigu tolunolu (30), katak direitus ba liberdade, seguransa no integridade ema ida-idak nian. Ne’e relata  katak povu Timor leste tenki toman responsabilidade ba ninian direitu  umanu. Atu nune’e povu Timor nian direitu umanu  nafatin buras hanesan ai-funan ne’ebé buras iha jardin ida. Bainhira jardin ida ne’e furak mak ema hotu sei gosta atu mai visita fatin refere. Nune’e mós direitu  umanu bainhira povu Timor kuidadu ka segurasan no integridade ninian direitu umanu  ho diak, mak sidadaun seluk ka nasaun seluk sei la sama ita nian direitu  umanu.

    Iha Artigu  haatnulu-resin-neen (46) mós koalia konaba direitu ba partisipasaun iha politiku. Ne’e hatudu katak povu Timor iha direitu umanu  atu partisipasaun organizasaun politika. Povu Timor tenki kuda domin ka paz atu nune’e labele kria problema bainhira partisipasaun iha politiku. Tanba laiha domin entre ema, Paz sei ladura iha sosiedade nian leet. Se bainhira povu Timor laiha paz mak laiha dezenvolvimentu ba nasaun ida ne’e. Tanba domin ka paz sai hanesan felisidade ba nasaun hotu”.

    Papa Francisco admiti nafatin maka paz iha redasaun pasífika entre povu, garante iha futuru mellor ba oan sira ho liberdade no prospriedade, Paz la’os tema laiha konflitu, ma’ibé paz tenki bazeia  mós ba respeitu dignidade umanu no direitu fundamentál ema ida-idak nian, tanba só ho ida ne’e mak bele hetan paz ida loloos no dura iha sosiedade no nasaun ida nian laran, tanba laiha respeitu umanu no tratamentu hanesan ba ema hotu, mak paz sei la dura, nune’e sei nakonu ho konflitu”.

    Iha kontituisaun RDTL Artigu ruanulu-resin-ualu (28), Artigu haatnulu-resin-ualu (48) no Artigu limanulu (50) hakerek katak: “direitu  ba rezistensia no defende an rasik, direitus atu halo petisaun, no direitus ba servisu”. Ne’e signifika  katak povu Timor tenki iha liberdade atu ekspresaun ninia direitu  umanu. Tanba sidadaun hotu-hotu iha direitu  atu lasimu no reziste hasoru orden ne’ebé latuir Lei eh ne’ebé ofende nian direitu, liberdade no garantia fundamentál sira.

    Hanesan Rai Boben Timor-leste bainhira  koloniál Portugés no Indonezia  ne’ebé halo kapturasaun, persigisaun, torturasaun ba povu Timor. Povu Timor senti triste tanba ema la respeita sira nian dignidade no direitu  umanu. Problema hirak ne’e, mak hafanu Sr. Nicolau Lobatu ho ninia kompañeirus sira nian fuan atu  foti desizaun katak ita tenki liberta direirus umanus povu Timor nian.Tanba Povu Timor moris iha sira nian nasaun rasik ma’ibé sira senti nia-an, hanesan la’os sidadaun Timor-leste nian oan. Buat sira ne’e halo povu Timor hanesan ema folin laek ne’ebé la aguenta ona atu moris iha nia rain rasik. Situasaun hirak ne’e komesa loke Sr. Nicolau lobatu ho ninia kompañeiru sira nia fuan, sira halo kartu petisaun katak: “Timor tenki ukun rasik-an”. Tanba sira hakarak  atu defende povu Timor nian direitus umanus  no dignidade rasik. Ho prinsipiu ida mak Sr. Nicolau lobatu hato’o diskursu abertura iha Palasiu “por do sol” Lahane iha loron 29-11-1975 katak : “ita tenki hamri’ik ukun rasik-an atu bele liberta direitus umanus do povu Timor. Tanba Rai Timor,,,,,uma ita nian ona, uma nain mak ita”. Tanba ita mak direitus atu ukun ita nian nasaun ida ne’e. sidadaun seluk ka nasaun seluk labele deskriminativu ba ita nian direitus umanu. (refrensia: opiniaun iha TimorPost)

   Hakerek na'in konklui ho lian Latin hateten katak : “vita mutator, Don toliter”. Signifika katak: “ Moris ne’e la’os atu destrui, ma’ibé moris ne’e tenki renova”. Konteudu  ida ne’e hakarak fó hanoin mai ita katak ita tenki fó moris ba ita nian direitu  umanu. Ho lia-fuan seluk katak direitu  umanu mak sai  xave fundamentál ba ema individu. Tanba tuir Maromak nian liafuan no tuir  sientista sira nian hanoin  katak direitu  umanu  mak direitu ne’ebé  grasa ka misteriu ida hosi Maromak no direitu umanu  mak direitu ne’ebé belit iha ema ida-idak nian dignidade. Ho ida ne’e ema ida labele viola ema seluk nian direitu. Implementasaun direitu  umanu  iha Timor-Leste katak la’o hela ma’ibé dalabarak sei sidi-sidi hela tanba la’os ema hotu-hotu hala’o sem-porsentu. Tanba ema barak mak seidauk komprende didi’ak  atu uza konaba direitu  umanu  iha Timor-Leste.