POEZIA : HA’U MORIS TAMBA ITA NIA DOMIN

 

HA’U MORIS TAMBA ITA NIA DOMIN

Foto: Avo Mane no Feto

Ha’u matan nakloke

Ha’u isin laiha kbi’it

Ha’u fuan laiha esperansa atu moris.

Ha’u la furak iha ema wa’in nia matan,

Ema wa’in hakribit ha’u ata…

Ema wa’in la prontu atu simu  ha’u nia presenza.

                   Ma’ibé

Tan ita nia domin atu simu ha’u ho liman rua.

Maske ita kosar hisik,

Ita prontu atu simu ha’u 

Atu sai ita nia oan hewai.

Ita nunka hato’o lian aat mai ha’u.

Ha’u tilun nunka rona lian mura-mura hosi  ita  ibun

Ha’u matan nunka haree oin-buis hosi ita oin.

                   Ma’ibé

Ita sempre hato’o lian midar mai ha’u

Ita  sempre hakuak ha’u ho ita nia domin

Ha’u ata la bele tetu ita  nia domin.

Ha’u ata la iha kapasidade atu sukat ita  nia domin.

Ha’u ata la bele selu ita  nia domin ma’ibé só  Maromak mak bele selu ita  nia domin

                   Tanba

Ita nia domin bo’ot tebes

Ita nia domin klean hanesan Tasi

Ita   nia domin aas hanesan Lalehan

Ita  nia  domin lakan hanesan Loron-Matan

Ita  nia  domin naroman hanesan Fulan

Ita  nia domin hewai hanesan Fitun iha Lalehan

Ita  nia domin wa’in hanesan Rai-henek iha Tasi.

                   Ma’ibé

Ha’u ata só hato’o agradese wa’in ba ita  domin

Ha’u moris tanba  ita  nia domin.

2018-  Indonezia

Rona avo mane nia mate.

by jose